打風?掛八號?提早放工?好多人一早已經放棄左呢個奢望,慨嘆李氏力場之威力,令打工仔女不論幾大風大雨都要硬著頭皮返工。當大家面對狂風暴雨習以為常嘅時候,其實現實中仲有好多唔合理嘅野。

係香港買野,現金、EPS、八達通及信用卡可以講係俾錢嘅主要選擇。行入茶餐廳食野,埋單找數俾現金;去 7-11 買野想俾錢?八達通呀唔該,一啫俾錢走人;行入 UNIQLO 買衫,俾信用卡一刷搞掂出門口。

不過香港係一個神奇嘅地方,有一種行業買野俾錢會比較麻煩。行入電腦舖買野,揀野問價埋單想俾錢,信用卡?唔好意思,要收手續費喎,你有無現金?或者 EPS?呢個情景,對於成日去電腦舖嘅朋友來講同打風無得放工一樣習以為常,但對於其他人來講真係匪夷所思。


有人話,係呀!信用卡有手續費麻,所以轉嫁番去顧客身上。聽落又好似幾有道理,但點解去旺中買衫、去藥房買日用品、去好少少嘅餐廳食餐飯又唔會轉嫁番去顧客到呢?其實我地又係咪好似習慣左李氏力場一樣,習慣左買電腦野俾信用卡一定要俾手續費呢?

見到中國、外國行 Mobile Payment 咁輕鬆方便,唔少人都係到怨香港行得好慢,但其實落番街,走入應該行得最前嘅電腦舖,竟然仲係連信用卡交易手續費都無法承受嘅時候,我地又點能夠奢望香港嘅 Mobile Payment 可以有進步呢?

或者真係 High Tech High 野、Low Tech 撈野。



Arlo Pro 網絡攝錄鏡頭 - 防水、內置電池、無線
詳情請點擊:http://www.anlander.com


此文章首發於 TechRitual;標題:【觀點】習以為常,就會令好多唔合理嘅野變成合理!;內容贊助:NETGEAR orbi,Mesh WiFi 子母機設計打通村屋