施政報告其中一項政策係落實手機遙控入錶,方便車主唔駛來回入錶。政策公佈後,唔少人將重點放係遙控入錶最多只係咪錶最長時間,批評用途有限,但其實另一項相關嘅政策 – 「提供實時資訊協助駕駛者尋找空置泊車位」對駕駛者可能更有幫助。

揸車嘅朋友都知道,泊車入錶唔係最苦,搵位泊車先係最苦。政府今次帶頭搞「實時泊車位」資訊確實係一件德政,起碼可以將本來靠經驗,講運氣嘅泊車變成一件睇手機就可以增加成功率嘅事,馬路上少左慢行搵位嘅車之餘,油錢都可以慳返唔少。

不過運輸署仲未講細節,唔知到時大家係要用政府嘅 Apps 還是政府願意開放數據令大家係第三方 Apps 都可以睇到車位資訊,真正方便駕駛者。大家都知,一條街入面唔止政府車位,仲有私人停車場,如果只係得政府個 Apps 可以睇到街邊泊位,又要打開商場個 Apps 先可以望到商場嘅車位都幾麻煩,揸車都危險啲。


如果政府帶頭開放泊位數據,吸引一眾私人停車場都開放數據,到時市面上嘅第三方地圖或者科技公司就可以拿住呢啲數據去開發一個泊車 Apps,一眼睇哂政府或私人停車場,邊度有車位,咁就真正方便駕駛者啦!

當然啦!政府開放數據咁大件事一定未必咁快搞得掂,因為好似上面提到嘅遙控入錶,由 2012 年講到依家 2017 年,足足五年先成事,想政府開放泊車位數據咁大件事,等嘅時間似乎都唔會短得去邊囉!想係中環搵到車位,似乎短期內都係要靠經驗,講下運氣。



Arlo Pro 網絡攝錄鏡頭 - 防水、內置電池、無線
詳情請點擊:http://www.anlander.com


此文章首發於 TechRitual;標題:【觀點】政府公開泊車位實時數據更有利駕駛者;內容贊助:NETGEAR orbi,Mesh WiFi 子母機設計打通村屋

Stone IP 目前是自由撰稿工作者 + 社群網站經營,曾經於 Engadget 中文版工作八年之久,職至高級編輯。文章撰寫以貼近生活為主,內容以科技網絡與旅遊紀錄較多。此博客瀏覽量已超越達到 1,300 萬。