事情是這樣的,小米前日好高調咁話「自主研發」摺屏,但即刻俾人踢爆係「買人地概念機」來扮野。咁小米梗係有回應啦!先送上小米官方回應:

小米有以下聲明:
小米雙折疊手機是小米自主研發的創新產品。這款手機的柔性折疊式屏幕設計是小米和供應鏈合作夥伴聯合開發的成果。雖然折疊式柔性屏幕是折疊手機的關鍵組件,但屏幕以外還涉及機身結構、堆疊、零件定制、交互設計、系統調配等多個不同關鍵創新範疇。以上各項皆是小米在雙折疊手機研發的自主創新成果。
雖然小米並非首家涉獵折疊手機,但小米的確是行業首家能夠做出雙折疊手機的品牌。雙折疊、單折疊和全打開都會讓柔性屏幕處於不同的形態,承受不同的壓力。如何在全機及轉軸設計上盡可能保護屏幕,是整個手機設計的難度之一。小米雙折疊手機是從十多種設計中反覆進行實驗驗證,才有了目前理想的解決方法。
每一款劃時代的創新產品都是上游供應鏈廠商和終端廠商共同努力的心血。只有協同傾力研發,才能為用戶提供真正優秀的產品和體驗,推動業內創新競爭共同進步。

踢唔明?梗係啦!小米呢啲公關語來,就咁睇係唔會明的,等小T同你拆解小米其實講左咩:


合作夥伴即係都係我啦!

小米第一句表面係咁講:「小米雙折疊手機是小米自主研發的創新產品。這款手機的柔性折疊式屏幕設計是小米和供應鏈合作夥伴聯合開發的成果。

但如果轉走啲公關語就係「雙折疊係我地自主研發,不過供應鏈嘅合作夥伴都有同我地一齊做,咁合作夥伴嘅成果係我地嘅成果,無我地邊有供應鏈。」呢段說話係咪有啲熟呢?無錯「下屬的功勞全歸上司」,無我俾錢買你啲野,邊有得你研發呀~~

柔性屏我再加左野上去就係自主研發

小米第二句表面係咁講:「雖然折疊式柔性屏幕是折疊手機的關鍵組件,但屏幕以外還涉及機身結構、堆疊、零件定制、交互設計、系統調配等多個不同關鍵創新範疇。以上各項皆是小米在雙折疊手機研發的自主創新成果。」

一樣轉走啲公關語就係「雖然柔性屏好重要,但係我加左啲野入去喎,都係好創新,所以絕對係我地自主研發」。明未?邊個研發左柔性屏唔緊要,我加左啲野入去令柔性屏更好,仲複雜,絕對係我地自主研發,就同 Android 本身我地再加左個 UI 介面功能上去,一樣係我地自主研發嘅 OS 一樣。


有片就代表做左出來

第三句「雖然小米並非首家涉獵折疊手機,但小米的確是行業首家能夠做出雙折疊手機的品牌。雙折疊、單折疊和全打開都會讓柔性屏幕處於不同的形態,承受不同的壓力。如何在全機及轉軸設計上盡可能保護屏幕,是整個手機設計的難度之一。小米雙折疊手機是從十多種設計中反覆進行實驗驗證,才有了目前理想的解決方法。」

簡單來講係重複講上面個段,再加多啲野入去,而要留意嘅係「小米的確是行業首家能夠做出雙折疊手機的品牌」。即係話只要有條片播放就叫做左出來,唔需要有真機,也唔需要發售。如果咁都係得,咁 Tesla 只要發佈左嘅車就當做左,做車就唔駛分概念車或量產車了。

廢話唔駛解釋

第四句「每一款劃時代的創新產品都是上游供應鏈廠商和終端廠商共同努力的心血。只有協同傾力研發,才能為用戶提供真正優秀的產品和體驗,推動業內創新競爭共同進步。」


呢個唔駛解釋,因為如同「阿媽係女人」一樣,講係無意義的,請做出來。最後勸說一句「口講無憑,有種拿量產機出來發售」。



此文章發佈於 TechRitual; 標題:小米「摺屏」假研發事件,小米回應了!同你拆解佢其實咩都無講過; 內容贊助:專業攝影遮光罩 Ultimate Lens Hood & 全世界最平嘅 Google Home Mini
SHARE
Tim Chan 陳景道,為 HelloReporter & HelloPR 共同創辦人,以科技為初創及中小企提供PR服務。也成立了 Growth Marketer Academy 在亞洲推動 Growth Marketing。Tim 曾加入 Appworks, Cyberport, Google EYE, HKFYG SIC 不同的創業加速器計劃。 和伙伴們成立了以 Tech, Growth, Community為主題的項目及社群:、CMX HK 、Influencer Insider、 TEDxHKBU 及 Code4HK 等。 Tim 曾在 Tech in Asia, Startupbeat, Medium 及 timktchan.com 發表文章。