強國品牌小米上季度先高調宣佈成功K.O另一國產華為，估唔到過左個幾月，又有「好」消息，今次更成功取代佢哋一直「參考」嘅對象蘋果。據調研機構 Canalys最新報告顯示，小米全球智能手機市場佔有率達到 17%，超越蘋果晉升全球第二，同比高速增長 83% 。Canalys 更同時表示，小米已經完成由挑戰者到市場主導者的業務升級，而小米嘅新目標就係取代三星成為全球最大嘅智能手機廠商。
精明嘅讀者其實都應該好清楚，呢類調研所得嘅數據都只係講緊出貨量，並唔代表市場佔有率同品牌價值，所以唔洗太認真。以小米過去半年嘅機海策略，同蘋果一年先得幾部機，邊個先係真正擁有市場，我諗都唔洗講到咁白，至於未來要取代三星，除左「哦」「Noted With Thanks」我諗大家都冇其他補充。一個真正引領未來嘅手機品牌，並唔係一味靠平一味靠參考其他廠商，的確，小米嘅機性價比係唔錯，但係設計同創新方面，以至整個品牌價值，同三星蘋果以至華為都有好大嘅距離。
一個成功嘅品牌係需要時刻向前，不斷突破同創新，而唔係只係靠參考得到少少成績就沾沾自喜。
