電睫毛夾 香港推薦:夾式與筆形,那款最好用?

首先電睫毛夾有兩大款,包括夾式同筆形。

夾式其實就好似平時普通嘅眼睫毛夾咁,靠壓個夾嘅力,再多咗發熱嘅功能,塑形就可以比起平時冇電嘅再容易啲、個弧度靚啲、同埋持久啲。佢嘅操作都好簡單,適合化妝新手,就算手殘嘅你都一定handle到。不過普遍夾式都比較大,啱喺屋企用,帶出街用就唔係好方便。

筆形其實就似平時嘅 mascara,用法都係好似搽mascara咁,只不過毛刷嗰部分有啲熱,同埋因為係自己用手掃上去,就可以自由啲咁調整個攣度,相比夾式fix死夾嘅弧度嚟講,筆形望落會自然啲,冇咁突兀。

無論係夾形定筆形,我都試過用,仲有唔知你哋有冇試過用夾式嘅時候唔小心夾到自己眼皮,痛到pk,真係 _ 都流哂出來呀…

筆形就唔會有呢個問題勒,所以建議如果講緊嗰個係你嘅話就可以考慮用筆形喇。不過筆形個刷頭始終比較細,有時要分幾次掃先整到最啱心水嘅弧度,所以都唔容易控制,適合啲化妝老手用。

實際操作其實就筆形大優勢啲嘅,主要係因為佢可以自由調整角度,眼角眼尾呢啲detail位都可以照顧周到,同埋佢接近睫毛嘅時候感覺嘅溫度都唔會太高。相對夾式嘅,萬一真係夾到自己眼皮,應該就唔單止痛到 PK,仲會辣到pk,咁就真係唔慌靚喇。。。

綜合嚟講,我就建議上睫毛用夾式嚟處理,因為捲度易定型啲,筆形捲翹效果弱啲嘅就用嚟處理下睫毛,因為下睫毛比較疏同少。

咁揀定咗自己prefer邊種款式嘅電睫毛夾之後,仲應該點揀其他唔同品牌型號呢?

預熱速度

話明要加熱,就梗係同之前講嘅直髮夾留意同一樣野,就係預熱速度喇。每日臨出門口化妝已經趕到死,個電睫毛夾加熱得慢,分分鐘就係累到你返工出門口遲到嘅兇手。所以我諗加熱得快一定係大家超重視嘅一點。一般電睫毛夾都要2-3分鐘預熱,有啲十幾秒就搞掂。話晒女人每朝出門口都分秒必爭,好似打仗咁,又要預時間搞呢樣搞嗰樣,真係慢左秒都唔得嘅就自己諗啦。

選擇易清潔保養的款式

大家知唔知道其實用電睫毛夾之前係應該先用咗mascara先再夾㗎?因為咁樣算係打層底,其實道理就就同用捲髮器夾頭髮之前最好用髮尾油嗰啲搽一次頭髮先一樣,冇咁容易令睫毛受損。亦都係因為咁,自然個電睫毛夾就好容易有啲mascara或者粉底嗰啲卡住咗喺個梳齒或者夾上面,跟住燙熱嘅功能都會因為有嘢隔住或者kick住而受到影響。仲要有常識嘅都知啲發熱嘅嘢冇可能直接用水沖,淨係可以用紙巾或者刷抹走啲污糟野。所以最好揀買邊個嘅時候,睇定究竟佢容唔容易清潔喇。夾式嘅可以留意橡膠嗰個位會唔會容易卡住啲嘢,筆形嘅就一係揀梳齒冇咁密、凹槽少啲嘅,又或者嗰啲有專用清潔刷嗰啲款。電池就可能係最簡單方便,一般都用一段長時間電池先會冇電。

依家市面上電睫毛夾都分好多種供電類型,有入電池嘅、插電嘅、USB叉電嘅。三種入面插電會比較上麻煩小小,帶出街用就唔太方便,冇插頭就可以收皮先,無得隨時搭搭下車想補夾下咁。USB叉電呢款就有機會用一陣就冇電,電池續航力比較低,成日都要差,用用下冇電又冇得差就麻煩。所以揀邊款其實都係depends你自己平時用嘅習慣係淨係屋企用,定想可以帶出街隨時可以補夾啦。

咁不如分享小小用電睫毛夾嘅skills比大家啦!

首先一定係頭先已經講過嘅用咗mascara先好夾!唔用嘅話你啲眼睫毛應該好快可以玩完。。。咁開始夾嘅時候應該由眼睫毛嘅根部開始逐小逐小咁燙,由個根去到尾大概燙3次就可以整靚到個弧度,跟住再成排睫毛慢慢燙3-4次,趁機調整下啲位,咁就應該掂晒。跟住下眼睫毛就開始打大佬,始終下眼睫毛比較短啲、少啲同疏啲,所以要小心啲逐小咁燙,如果辣到隻眼,為咗貪靚盲埋就67了。

啊,除咗夾之前用mascara,因為電睫毛夾會搞到原本嘅mascara融咗啲,所以夾完之後都應該要用梳狀嗰隻mascara再刷多一層就可以令到啲眼睫毛濃密返。

最後推薦4款入門嘅電睫毛夾比大家,包冇死!

第一款係筆形嘅貝印 KOBAKO,佢機身好輕,得29g,帶出街絕對冇難度。預熱速度大概100秒。最特別嘅係佢有高低溫兩種模式,眼睫毛比較硬嘅可以較高溫模式,比較軟嘅可以較低溫模式。同埋因為佢C字型刷頭,刷毛又細緻,令到睫毛電完個弧度啱啱好,可以好easy處理到嗰啲detail位。重點係唔太貴,$231就有!

第二款係筆形嘅Panasonic EH-SE11P自然型捲燙睫毛器,佢機身仲輕,得16g,預熱時間90秒倒。最特別嘅係佢有雙排加熱器,同埋佢嘅溫度比較高,所以電出黎嘅眼睫毛會挺啲。佢仲有變色指標話你知個溫度幾時啱,同埋安全裝置避免你辣死自己。整體嚟講,呢款嘅功能好全面,價值都只係$114,好抵入手。

第三款嘅夾式HITACHI日立 HR-550電熱睫毛夾係相對貴少少,要$437,但係功能上對得住佢價錢嘅選擇,budget較多嘅就可以考慮佢。佢嘅預熱速度快到10秒就得,再加上冇邊框嘅設計,所以好容易可以對準眼睫毛,gum一下制就夾到,唔洗自己用力。佢仲好貼心咁有個細燈仔,暗啲嘅地方都可以用到。

第四款係學生或者月尾手緊人士大恩物,超平價但好用嘅筆形Eyecurl ii超持久電燙睫毛器。佢真係平到$44就有得入手。佢一樣有指示燈睇到溫度預熱好未,有兩種溫度模式,同埋有隔熱嘅物料設計,冇咁易辣到自己。如果以$44嚟講,有晒大部分需要嘅功能,真係用幾次都抵。如果係想小試牛刀嘅話,其實呢個真係啱晒,就算買左最後唔啱都唔會肉赤。

此文章發佈於 TechRitual 香港 - 日本電話卡
十斗
十斗https://www.techritual.com/author/tenten/
十斗在知名大學取得了計算機科學與工程學位,並在學術研究方面表現出色。她的研究領域包括人工智能、機器學習和數據科學。一斗為十升,一升為十合,一合為十分之一升。謝靈運言天下才學一石,曹植占八斗,以此讚譽。後用以比喻才學極高。