HKT 旗下嘅網上行 netvigator 早兩日宣佈推出「4 X 1000M 多連接寛頻服務」，係現有最快 1Gbps 速度嘅基礎上提昇 4 倍，令一個普通人嘅屋企都可以有商業級嘅網絡服務。
就咁聽落或者比較難明，石先生再用另一個說法來講。一直以來，如果你屋企係有光纖嘅話，netvigator 入屋條光纖都有 10Gbps 嘅傳送能力，但不論係 modem 定 switch 定 router，其實都只有 1Gbps 嘅傳送能力，所以就算 netvigator 開盡左 10Gbps 俾你都無用。
今次 netvigator 係現有光纖入屋嘅基礎上，利用一個新型號嘅 modem，將一條提供 10Gbps 嘅光纖線放成 4 條各 1Gbps 嘅 WAN Cable 俾你用，令你嘅上網速度可以 x4。
上圖就係記者會當日演示嘅新型號 modem，訊號一樣係由光纖入屋再入 modem，但出嘅時候就好似下圖咁，會分成 4 條各 1Gbps 嘅 WAN 出，所以係日常上網嘅時候，一部裝置最多都只係可以用到 1Gbps，約 1000Mbps 嘅速度。
既然最多都只係 1,000Mbps，點解要用「4 X 1000M 多連接寛頻服務」呢個服務呢？答案好簡單，分工分頻寛。
依家嘅網絡需求愈來愈大，阿爸串流睇緊英超，阿媽串流睇韓劇，阿仔再用 NAS 來 BT，一條 1Gbps 實唔夠用，總會有人窒下窒下。
今次呢個 「4 X 1000M 多連接寛頻服務」就係一個最直接嘅解決方法，4 條 1Gbps，每人用一條專線，一條專駁電視，一條專駁 NAS，一條專駁 IOT，一條放 WiFi，用物理嘅方式來分線路，唔駛再搞咩 Dynamic QoS 都一樣可以平分到速度，對於高需求嘅朋友來講真係一件好事。
當然，一時之間升級上「4 X 1000M 多連接寛頻服務」未必用得著，始終月費都要 4 級咷去到 HK$458，值唔值都係一個問題。
不過 netvigator 同時推出嘅「2 X 1000M 多連接寛頻服務」月費只係 HK$168，相比平時閒閒地月費 HK$200，真係平左一大截！
如果係即將到期或者用緊其他台，呢個服務加價錢真係真心吸引，難怪記者會一完，現場大量人士已經想即時俾錢上台。
