Apple 2019 年最新的 iPhone 11 系列手機喺今日（20日）開賣，新一代 iPhone 無論相機、效能等等都有顯著改進之外，其中一項筆者同唔少消費者都留意到嘅，係 iPhone 11 系列仍然剩係最高支援 4G LTE 流動網絡，而唔係眾多旗艦 Android 手機已經開始支援嘅 5G 制式。
5G 標準與數據晶片仍未成熟
當然，最根本嘅原因，有可能係 5G 仲未有一個完整嘅 5G 標準，現時嘅 5G Release-15 可以當做 4G LTE 加強版，來年 5G Release-16 標準正式應用之後，成個 5G 標準先至會比較完整。加上喺數據晶片嘅層面，今年年頭 Qualcomm 先推出同時支援 LTE 同 5G，用上最新 7nm 製程嘅 Snapdragon X55 數據晶片，加上 Apple 同 Qualcomm 嘅關係啱啱先回溫，預計最快都要下一代先至有配備 Qualcomm 數據晶片嘅 5G 版 iPhone。
而先前推出嘅 5G 手機中，大部份採用剩係做到 5G 嘅 Qualcomm X50 數據晶片，萬一收唔到 5G 而轉用返 4G，就要切換去返處理晶片組（SoC）入面內置嘅 LTE 數據晶片，加上用 28nm 舊製程，結果又耗電又佔位置，而且喺 LTE 同 5G 切換嘅過程中會略感唔順暢，雖然作為第一代嘅 5G 手機係可以理解，但並未符合消費者嘅期望。
以香港作例，LTE 都可以好夠用
講返轉頭，其實舊年登場 iPhone Xs / Xs Max，已經具備 LTE Cat 16 最高 1Gbps 嘅下載速度，，而今年連最基本嘅 iPhone 11 都支援到 LTE Cat 19 嘅 1.6Gbps 添！當然大家都明白，呢個只係理論值，實際做到幾快，都係睇個網絡供應商持有幾多頻寬，以及客量同用量。不過如果睇返香港嘅情況，現時 LTE 頻譜資源極為緊張，唔係話加話買就可以擴頻，所以呢兩年新 iPhone 同一啲 Android 旗艦機都支援嘅 LAA 技術，成為現時喺香港擴大 LTE 頻寬嘅新做法。
咁 LAA 又係何方神聖？LAA 利用 Wi-Fi 頻段（未授權頻譜）嚟做 LTE 數據傳輸，以香港為例，香港暫時淨係得 SmarTone 有採用呢個技術，喺人多嘅地方安裝小型基站（Small Cells），結合現有嘅授權頻譜及未授權頻譜，嚟解決人多地方上網慢嘅問題。換句話講，頻寬闊咗，可以容納嘅裝置多咗，自然體驗都好啲！
5G 仍然係未來趨勢
其實如果用盡現有嘅 LTE 技術，速度上已經夠快同應付到現時嘅需求，但科技同我哋一樣要力求進步，除咗政府喺 5G 頻譜上嘅安排進度，亦都要等 5G 數據晶片更成熟，先至可以有更好嘅 5G 使用體驗。
2019 年作為 5G 元年，大家都好期待完整嘅 5G 網絡開始喺世界唔同地方投入使用。而喺充滿地形挑戰、人口密度高、電訊商激烈競爭嘅香港，電訊商都想運用有限且珍貴嘅 LTE 同 5G 頻譜資源，帶畀用家最好嘅體驗。而喺現時嘅進度，即使 5G 正式投入使用也好，初期覆蓋率並唔會完全覆蓋香港，意味著嚟緊呢幾年 LTE 仍然會係主力，而 LAA 作為 LTE 嘅輔助頻寬，電訊商喺香港密集嘅地方設置小型機站，有效改善繁忙區域嘅數據傳輸，帶畀用家接近 5G 速度嘅體驗！
5G時代將到，Across Asia 期待有更多產品伴隨住突破性技術蒞臨香港市場。作為公關，Across Asia 對客戶嘅產品同服務都要非常熟悉，再以唔同故仔同角度，向各個持份者分享開去！
同 Apple 產品發佈會一樣，記者一般都會嚮發佈活動期間即場實測產品。大家可以參考一下 Across Asia 點樣舉辦Jabra世界盃活動
另外，大家亦可以睇吓點樣寫到一份好嘅產品測試報告
謝謝支持，更多 Techritual 好文請按這裡
