Ray-Ban Meta 系列今次加入咗一位新成員 Ray-Ban Meta Audio。佢係系列第一款冇鏡頭、只有聲音功能嘅 AI 眼鏡，預計 2026 年第四季推出。佢唔可以影相或者拍片，改為專注聽歌、打電話同用 Meta AI，啱晒唔想戴住鏡頭出街、又想有智能功能嘅用家。
品牌至今最輕，只重 43 克
Ray-Ban Meta Audio 係品牌至今最輕嘅 Ray-Ban Meta，只重 43 克。因為冇鏡頭，鏡腳可以做得更纖薄，外觀亦更似傳統眼鏡。鏡腳末端用可調節鏡腳套，戴得更穩。官方提到，鏡腳套只可以手動調校，唔可以加熱調整，而且只可以向內屈。
Clubmaster 同 Burbank 兩款經典鏡框
首發有兩款鏡框。Clubmaster 靈感來自 50 同 60 年代嘅眉框造型，上半部係膠框，下半部係金屬框，配可調式鼻托。Burbank 最早喺 60 年代推出，2021 年再度回歸，用方形醋酸纖維鏡框，配可替換鼻托。兩款都用超延展鉸鏈，頭大啲嘅用家戴落都冇咁夾。
為度數鏡片而設
Meta Audio 特別為度數鏡片優化，用 4 基彎鏡片，前框有 5 度傾角，所以可以配更廣嘅度數範圍。對日日都要戴眼鏡嘅近視或者老花用家嚟講，佢可以直接取代平時嗰副眼鏡。
開放式音響，加六個咪高峰
眼鏡用開放式音響，配合增強型揚聲器模組，耳仔唔使塞住都可以聽歌、聽 podcast 同打電話。內置六個咪高峰，配合先進嘅抗風噪技術，講電話同對 AI 講嘢都會清楚啲。另外有可以自訂嘅功能鍵，一撳就開 Meta AI 或者常用功能，全程唔使拎出手機。不過因為冇鏡頭，「睇住嘢問 AI」呢類視覺功能就用唔到，而 Meta AI 暫時亦都未支援廣東話。
12 小時續航，系列最長
Meta Audio 充一次電，混合使用最長可以用 12 小時，係 Ray-Ban Meta 系列至今最長。放入充電盒，可以額外多 48 小時。其他規格包括藍牙 5.3 同 IPX4 防水，支援 iOS 17 或以上，以及 Android 10 或以上。
推出時間
Ray-Ban Meta Audio 預計 2026 年第四季推出，香港售價待公布。不過香港暫時未有發售，香港而家只係買到第三代。想要齊鏡頭功能嘅用家，可以揀已經開售嘅 Ray-Ban Meta 第三代，HK$3,759 起。
