Ray-Ban Meta 而家一共有四款：全新冇鏡頭嘅 Ray-Ban Meta Audio、第二代、第三代，仲有專為配度數而設嘅第二代光學款。不過要留意，香港暫時只係買到第三代。四款外形都似，但鏡頭、續航、咪高峰同鏡框設計其實分別唔細。我哋根據官方參數對照表，逐項拆解第三代同其他型號有咩唔同。
Meta AI 香港已經用得，唔使 VPN
先講一個好消息：Meta AI 而家已經正式喺香港用得，唔使再開 VPN。以前香港用家用 Ray-Ban Meta，好多 AI 功能都要靠 VPN 先用到，而家直接用 Meta AI App 連眼鏡就得。四款眼鏡全部支援先進 Meta AI，可以用語音問嘢、聽資訊、處理日常小事；不過 Meta Audio 冇鏡頭，所以要靠鏡頭睇嘢嘅 AI 功能就用唔到。
四款款式一覽
Ray-Ban Meta Audio 有 Burbank 同 Clubmaster 兩款鏡框；第二代有 Wayfarer、Headliner 同 Skyler；第三代有 Wayfarer、Aviator 同 Zena；第二代光學款就有 Blayzer Optics 同 Scriber Optics。
有冇鏡頭係最大分別
Meta Audio 係唯一一款冇鏡頭嘅型號，主打聽歌、通話同 Meta AI 語音，所以亦冇內置儲存。其餘三款都有 1,200 萬像素超廣角鏡頭，影相解像度 3024 x 4032，拍片 3K Ultra HD 30fps，並有可調節防震，儲存都係 32GB。
第三代同第二代光學款嘅鏡頭及 LED 開孔，比第二代細咗 36%，戴喺面上冇咁搶眼。
續航：Meta Audio 最長氣
單次充電續航方面，Meta Audio 最長可達 12 小時，第三代最長 9 小時，第二代最長 8 小時，第二代光學款就超過 8 小時。充電盒方面，第三代額外續航最長 50 小時，其餘三款就係最長 48 小時。
咪高峰同收音
第二代內置 5 組咪高峰。Meta Audio 同第三代就升級到 6 組，配備先進風噪抑制技術；第二代光學款都係 6 組，配背景雜訊減低技術。成日喺街講電話、出風位用嘅話，新款收音會更穩陣。
配度數鏡同鏡框適配
四款都可以配度數鏡，但 Meta Audio 同第二代光學款就特別針對度數配鏡優化，並有超延展鉸鏈。Meta Audio 嘅 Clubmaster 有可調節鼻托，Burbank 就係可替換鼻托，兩款都有可調節鏡腳套；第二代光學款有可替換鼻托同可調節鏡腳套；第三代就有可調節鏡腳套。平日要戴眼鏡嘅朋友，可以優先考慮呢兩款。
操控、連接同防水
四款都有電源滑動鍵同電容觸控。有鏡頭嘅三款另有拍攝按鈕，第三代、第二代光學款同 Meta Audio 亦有功能按鈕。連接方面全部支援藍牙 5.3，有鏡頭嘅三款另外支援 WiFi 6。防水等級全部係 IPX4。
相容性方面，Meta Audio 同第三代要求 iOS 17 或以上、Android 10 或以上；第二代同第二代光學款就係 iOS 16 或以上、Android 10 或以上。
香港只買到第三代
香港而家只係買到第三代，第二代、第二代光學款同 Meta Audio 暫時都冇喺香港發售。好在第三代本身已經係最新最全面嘅一款：鏡頭及 LED 開孔比第二代細 36%，單次續航最長 9 小時，充電盒額外續航最長 50 小時，又有 6 組咪高峰同風噪抑制，加上 Meta AI 已經唔使 VPN 就用得。想喺香港即刻買一副 AI 眼鏡影相拍片，第三代就係唯一選擇，亦係最值得揀嘅一款。至於 Meta Audio 同光學款會唔會引入香港，就要等官方消息。
延伸閱讀：Ray-Ban Meta 第三代香港登場
