香港屋企細，但空氣問題唔細：窗外係馬路同地盤嘅塵，屋內有廚房油煙、寵物毛、新裝修甲醛，再加上流感季節，唔少家庭都想放一部空氣淨化器喺廳。問題係，坊間好多機都係「一個房間一部」嘅細機，想成個廳連埋開放式廚房一齊處理，就要揀 CADR 夠大嘅型號。
小米 米家空氣淨化器 6 Plus 就係衝住呢個需求而嚟。佢喺香港賣 HK$2,499，主打全新嘅塔式單馬達雙葉輪、雙濾芯結構，官方標示顆粒物 CADR 達 810m³/h，覆蓋範圍 53 至 91m²，另外仲加咗 UVC 消毒模組同負離子功能，又內置 5 個感應器同米家 App 監測。不過一切規格都唔係重中之重，而係成個空氣淨化器的結構來左一個大改變
產品規格
- 型號：AC-M35-SC
- 尺寸：280 x 280 x 713mm
- 額定電壓／頻率：200–240V~，50/60Hz
- 覆蓋範圍：53–91m²（官方以額定 CADR 760m³/h 計算）
- 顆粒物 CADR：810m³/h（官方實測值）；額定 760m³/h
- 甲醛 CADR：234m³/h（官方實測值）
- 氣流：12,666L/min（以額定 CADR 換算）
- 10m² 房間換氣時間：1.9 分鐘（以 2.4m 樓底計算）
- 結構：塔式單馬達雙葉輪、雙濾芯，三面進風、兩側出風
- 過濾：五層複合淨化 — 初濾網、高效濾網、除甲醛活性碳濾網、UVC 光陣列、負離子層
- 去除率（官方 1 小時）：PM1 / PM2.5 / 灰塵 99.99%、H1N1 流感病毒 99.99%、花粉致敏原 98%、塵蟎致敏原 98.1%、貓隻皮屑 99%
- 去除率（官方 2 小時）：甲醛 98%、TVOC 97%
- 認證：SGS 除致敏原空氣淨化器認證（證書編號 PT/26/GEN/0236）
- 感應器：PM1、PM2.5、粉塵、溫度、濕度共 5 個
- 噪音：最低 19.4dB(A)（官方聲壓數據）
- 控制：機頂 LCD 螢幕、米家 App、Amazon Alexa 及 Google Assistant 語音
- 其他：隱藏式 360° 滾輪、密封頂蓋、濾網更換提醒
- 包裝內容：空氣淨化器 x1、電線 x1、濾芯一套（2 個裝）、使用說明書 x1、圖解指南 x1
- 售價：香港建議零售價 HK$2,499
開箱：一個盒、一部機、兩個濾芯
零售盒係直立嘅長方形白盒，正面大幅印住機身相，頂部一行細字係產品名。盒側面就印住「mijia Smart Air Purifier 6 Plus／米家空氣淨化器 6 Plus」同 6 個功能圖示：Dual Impellers & Dual Filters、5-Stage High-precision Air Quality Monitoring、5-Stage Filtration、UV Disinfection & Sterilization、App Smart Control，基本上將成部機嘅賣點一次過列晒出嚟。
盒入面就係一部機、一條電線、一套兩個濾芯同兩本說明書。機身係一個 280 x 280mm 嘅方形塔，高 713mm，白色霧面塑膠，四隻角位圓潤，放喺廳角落唔算礙眼。
今次 6 Plus 唔再係機頂出風，機頂係一塊完全平嘅密封頂蓋，中央淡淡印住 mijia 標誌，冇任何出風口或者按鍵。官方話呢個設計係方便頂部擺嘢同減少積塵，實際上你放本書或者一杯水上去都得，抹起上嚟亦都容易，也更適合放係房中使用。
三面進風、兩側出風：拆開睇雙濾芯結構
機身兩側各有一塊由頂到底嘅長條形橫紋格柵，透過格柵可以直接見到入面白色嘅濾芯。機背係一塊可以整塊拎走嘅門板，上方有一個扁長嘅手位，門板上下各有一組較細嘅格柵。官方講法係三面進風、兩側出風，實物上左右兩側同機背都係開放式格柵，反而正面係完全唔吸風的，所以使用上如果放角落，反而應該將正面向牆，或者斜角放先係最佳選擇（如下圖）。
拎走機背門板之後，就見到成部機嘅核心：兩個圓筒形濾芯上下疊住，中間隔住一塊白色面板。呢塊面板有兩組圓孔透氣網，中間印住「顆粒物感應器」字樣，即係 PM 感應器就收喺兩個濾芯之間嘅位置。面板下半部印住三步換濾芯圖解：拉帶拎走舊濾芯、拆走新濾芯嘅包裝、裝好後合返門板，唔使揭說明書都知點做。
濾芯本身係圓筒形，外層係白色摺紋濾紙，內層係一圈黑色活性碳網，頂部同底部各有一圈黑色海綿密封邊。兩個濾芯外觀一模一樣。官方講嘅五層淨化入面，初濾網、高效濾網同活性碳三層就係呢個濾芯，UVC 光陣列同負離子層係另外兩層。
再拆開頂蓋，就見到「雙葉輪」入面其中一組葉輪嘅頂部：一個圓形嘅放射狀導流格柵，周邊係一圈平面。官方講法係一個馬達推動兩個葉輪，配合上下兩個濾芯形成兩股氣流，我哋影到嘅只係頂部呢一組。
機頂圓形螢幕：一眼睇晒 PM2.5、溫濕度同功能狀態
機身正面上方有一個圓形嘅黑色 LCD 螢幕，開機後中央用大字顯示 PM2.5 數值，我哋影相嗰陣係 009，字體綠色。數字上方一行細字係溫度 27°C、濕度 57%，再右邊係幾個狀態圖示，包括 Wi-Fi、UV 同負離子；數字下方係「Dust」同「PM1」兩個綠點，代表粉塵同 PM1 嘅等級。
螢幕圓周有四個觸控圖示：左邊係亮度、底部係電源，頂部同右邊各有一個切換圖示。冇實體按鍵，全部都係輕觸。我哋見到嘅時候數字一直係綠色，官方產品頁冇講顏色會點樣跟空氣質素變，呢度唔作補充。
米家 App：五個數據、四個模式、UV 同負離子開關
連接米家 App 之後，主頁最上方係一個大圓圈，顯示「室內綜合空氣品質」嘅評級，我哋連接嗰陣係「空氣優」，圓圈下方係溫度 28°C、濕度 53%。再落一行係三個數字：PM2.5 018、粉塵 001、PM1 003，單位 µg/m³。呢三個數同機頂螢幕嘅 PM2.5 有少少出入，因為截圖同影相唔係同一時間。
模式有四個：檔位、自動、睡眠、最愛。設定頁有 UV 燈、負離子、兒童鎖、顯示螢幕、螢幕亮度五個開關。「過往曲線」可以揀天、月、半年，逐個睇 PM2.5、粉塵、PM1 嘅走勢，右邊有「優／良／中／差」四段顏色刻度。
UV 燈同負離子兩個功能，App 入面各有一句提示值得留意。UV 燈嘅提示係「開啟 UV 可增強空氣消殺效果，同時抑制濾芯內表面細菌滋生」，即係 UVC 除咗照空氣，亦都係照住濾芯內側。負離子嘅提示係「開啟後，產品將持續釋放負離子，會有輕微噪音」，小米自己都寫明開負離子會有聲，瞓房用嘅話可以考慮夜晚熄咗佢。
官方數據點樣讀：810 同 760 兩個 CADR 係咩意思
小米產品頁同時出現 810m³/h 同 760m³/h 兩個顆粒物 CADR，唔係印錯。810 係威凱檢測嘅實測值，760 係額定值；覆蓋範圍 53 至 91m²、12,666L/min 氣流、1.9 分鐘換氣三個數字，全部都係用額定 760 去計，而唔係用實測 810。以香港標準單位嚟講，91m² 大約係 980 平方呎，即係官方話一部機可以覆蓋一個千呎單位嘅廳房面積。
甲醛方面，甲醛 CADR 234m³/h 係獨立測試值，2 小時甲醛去除率 98%、TVOC 97% 就來自廣州市微生物研究所。致敏原去除率係 SGS 認證，花粉 98%、塵蟎 98.1%、貓隻皮屑 99%、狗隻皮屑 98.1%。以上全部都係受控環境嘅測試結果，而且小米自己寫明係以「標準雙濾網結構」測試，唔代表單一濾芯嘅表現。
評價
米家空氣淨化器 6 Plus 最大嘅賣點係用一部機處理大空間：官方 810m³/h 實測 CADR，加埋 53 至 91m² 覆蓋範圍，喺 HK$2,499 呢個價位入面屬於大風量嘅一類。雙濾芯設計嘅好處係進風面積大，但濾芯係一套兩個，長遠開支要計清楚。
實物做工同我哋開過嘅其他米家家電一致：白色霧面塑膠、圓角、機背門板一拎就開，換濾芯圖解直接印喺機身。機頂螢幕嘅資訊量算多，PM2.5、溫濕度、粉塵同 PM1 等級、UV 同負離子狀態一眼睇晒；米家 App 就補足咗歷史曲線，官方話仲可以設定開關時間同智能場景。
要留意嘅位有三個：一，官方所有覆蓋範圍同換氣時間都係用額定 760 而唔係實測 810 計；二，負離子開咗會有輕微噪音，小米自己都寫明；三，機身 713mm 高、280mm 方，放喺細單位嘅走廊會有少少阻路，底部有隱藏式 360° 滾輪，可以推嚟推去。
值得另外一提嘅係，今次 6 Plus 嘅運作聲浪即使開到最大都明顯較以往細聲，而且不再向上，令 6 Plus 更適合成為一部令房間降溫的半風扇產品，加上頂部現在變可用，也可以放各類的用品，實用性大增。至於清潔問題，由於這次的出風位置是可以拿下來的，所以幾乎整機都可以清潔，較以往良好。
優點
- 官方顆粒物 CADR 實測 810m³/h、覆蓋 53–91m²，一部機可以應付香港常見嘅廳房面積
- 三步換濾芯圖解直接印喺機身面板，唔使睇說明書
- 機頂圓形 LCD 一次過顯示 PM2.5、溫度、濕度、粉塵同 PM1 等級，仲有 UV 同負離子狀態
- 米家 App 有 PM2.5、粉塵、PM1 三條歷史曲線，可以睇天、月、半年
- UV 燈、負離子、兒童鎖、螢幕全部可以獨立開關
- 密封平頂設計，頂部可以擺嘢，抹塵容易
缺點
- 濾芯一套兩個，換濾芯開支比單濾芯機高
- 負離子功能開啟後會有輕微噪音，官方 App 已經寫明
- 機身 713mm 高、280mm 方，細單位擺位要諗過
- 官方冇公佈最高風速嘅噪音數值
