Ray-Ban Meta 第三代 AI 眼鏡（Gen 3）由 10 月 20 日起正式喺香港同澳門開售，售價 HK$3,759 起。今代三款都有鏡頭，分別係 Wayfarer、Aviator 同 Zena。Meta AI 最近喺香港正式推出，所以呢副眼鏡唔使靠 VPN 都可以用到 AI 功能。
鏡框唔再得一款，Aviator、Zena 首度加入
第二代有鏡頭嘅款式主要係 Wayfarer、Headliner 同 Skyler。第三代就擴展到三種完全唔同嘅風格：經典方框 Wayfarer、1937 年誕生嘅飛行員框 Aviator，同埋大膽幾何貓眼輪廓嘅 Zena。Aviator 同 Zena 都係第一次加入 Ray-Ban Meta 系列，男女用家都有更多選擇。
戴落更貼面，唔使好似第二代咁另加鼻托
第二代 Ray-Ban Meta 對鼻樑較低、面型較闊嘅亞洲用家唔算好友善，唔少香港人買完都要另外加鼻托，眼鏡先唔會成日跌落嚟。今次第三代嘅鏡框同鏡腳設計更貼合面型，我哋試戴時，就算唔另加鼻托都戴得穩，對香港人嚟講係一個實際嘅改善。
更薄更細，似返一副普通眼鏡
Gen 3 嘅鏡臂高度減少約 1 毫米，厚度減少約 0.3 毫米，戴上去更似日常眼鏡。鏡頭同 LED 指示燈比第二代細咗 36%，前面睇落冇咁明顯。鏡腳末端改用柔韌鏡腳套，可以手動調校，更貼合頭部輪廓。不過鏡腳套唔可以加熱調整，只可以向內屈。
1,200 萬像素超廣角，最高拍 3K 片
鏡頭係 1,200 萬像素超廣角，相片解像度 3024×4032，影片最高 3K Ultra HD 30fps，仲有可調校嘅防震功能。撳一下鏡臂上嘅拍攝鍵，就可以用第一身視角影相或者拍片，唔使拎出手機。影相同拍片時，前面嘅 LED 燈會亮起，提醒身邊嘅人。相片同影片會先存喺眼鏡 32GB 嘅空間，之後再傳返手機。
六個咪高峰，加自訂功能鍵
眼鏡內置六個咪高峰，配合抗風噪技術，喺街上講嘢都聽得清楚啲。新增嘅功能鍵可以自己設定，一撳就開 Meta AI 或者常用功能。透過 Meta AI，用家可以就眼前所見嘅嘢發問、搵附近推介、即時翻譯對話、睇同發訊息，以及設定提醒。要留意，Meta AI 暫時未支援廣東話。
功耗改善，最長 9 小時
官方話 Gen 3 嘅功耗效率有所提升，充一次電最長可以用 9 小時。放入充電眼鏡盒，可以額外多 50 小時。其他規格包括藍牙 5.3、Wi-Fi 6 同 IPX4 防水，支援 iOS 17 或以上，以及 Android 10 或以上。
鏡片任揀，配度數都得
三款都可以配透明鏡片或者太陽鏡片，包括 Transitions 變色鏡片、偏光鏡片同防藍光鏡片，亦可以配近視、遠視等度數鏡片。
香港行貨有官方支援，壞咗直接換新
今次 Ray-Ban Meta 第三代喺香港有正式行貨，亦都有官方售後支援。官方表示，眼鏡如果壞咗唔會攞去維修，而係直接換一副新嘅，唔使等維修期。另外，用家可以配各類 Ray-Ban 鏡片，由平光鏡、太陽鏡片到度數鏡片都得，同平時喺門市配 Ray-Ban 眼鏡一樣方便。對比以前要靠水貨或者自己由外國買返嚟，而家喺香港買就安心好多。
售價及購買地點
Ray-Ban Meta（Gen 3）HK$3,759 起，可以喺 Ray-Ban 門市、EssilorLuxottica 旗下零售品牌門市，以及 EssilorLuxottica 喺港澳嘅批發網絡購買。Ray-Ban 亦預告冇鏡頭、只有聲音嘅 Ray-Ban Meta Audio，預計 2026 年第四季推出。
