VIDEO
平板電腦有時用嚟上堂或者溫書jot Notes，寫下筆記，無聊又可以拎嚟畫下畫，但係同時配合埋一個好用嘅jot Notes App 都好重要！而家市面上有兩大巨頭(?)分別係 GoodNotes 同 Notability （老人家嘅阿爸背後聲？：咩來嫁… 我只係識 Evernote… ），咁究竟呢兩個 App 有咩最大嘅分別？邊個好用啲呢？
網上面有好多比較呢兩個 App 嘅片，但係呢兩個 App 成日都update，條條片講嘅version都唔同，好難參考。今次我哋用咗現時兩個 App 最新嘅version： GoodNotes 嘅version 5.9.14 同 Notability 嘅version 11.0，同大家逐一比較，等大家清楚晒佢哋各自嘅好與壞，確保大家都可以揀到個最啱自己心水嘅！講真，有個好用嘅 App 有部tablet有支Pencil，真係會有心機溫書多啲~
價錢 本身 GoodNotes 同 Notability 呢兩個 App 都係免費Download，但係就要收費先至unlock到更多功能用～而基本上用免費版有好多限制，所以我哋都集中睇收費版。
GoodNotes 比58蚊就可以upgrade，永遠享用佢所有嘅功能，而 Notability 就要年費咁比，第一年比68蚊，之後再每年93蚊，而佢聲稱呢個係26%嘅價。(唔知點解我用另一個Device試佢upgrade要$113第一年，之後每年$153）咁樣價錢上嘅比較都好明顯 GoodNotes 只需要比一次錢對學生嚟講係容易負擔好多，平過 Notability 一大截，咁但係功能上又係點呢？ GoodNotes 係咪真係抵玩，而 Notability 又值唔值呢個價呢？
概括 先講結論：總括黎講，其實 GoodNotes 係追求廣度，咩都有啲，務求一個 App 可以取代到所有紙本嘅嘢，而 Notability 就係追求深度，覺得jot Notes唔可以就咁hea過就算，應該要好詳細，好精美。
其實 GoodNotes 同 Notability 嘅分別就唔係話好大，但佢哋各自「人冇佢有」嘅特點係邊呢？
我諗要講就一定係 Notability 最特別嘅功能：錄音！佢有個mic icon，gum落去就可以一路錄音一路寫嘢，仲可以錄好多段merge埋一齊。跟住播翻個錄音嘅時候，啲字都會同步好似模擬你寫嗰陣咁跟住彈出黎。 呢個功能一定係對嗰啲想溫書嘅時候再聽多次老師講解嘅人係世一，平時好易抄完又唔記得自己寫乜，呢個就超級方便可以好清晰逐part聽返嗰part筆記究竟係講緊乜。 Notability 仲可以favourite咗嗰堆常用嘅工具，放係左邊嗰欄，方便唔洗下下移返上去揀tools。我仲發現plus呢個付費plan係多好多design咗有主題嘅theme template，例如呢啲咁。
至於 GoodNotes 最特別就有flashcard功能可以寫個問題同答案，gum study flashcards就可以逐張溫，仲可以記錄究竟呢條題目easy， good，定係錯左要再嚟過，再比個piechart統計你。
佢仲有放大鏡功能，咁就唔洗下下兩隻手指放大張紙先寫到嘢，就咁就有個框幫你放大。有一個好適合教書用嘅功能就係有一點紅色laser可以畫，但係會自己自動消失返。
仲有平時google doc嗰啲咪有共同同步edit一個Document嘅， GoodNotes 一樣可以咁樣。只要share咗比一個同樣有good Notes嘅戶口，就可以一齊共用個Document。
仲有一個我覺得都好重要優勝嘅地方，因為依家每個人都基本上有幾個Device，iPhone， MacBook， iPad，當啲人係iPad Download咗，佢想係MacBook Download再用係可以restore purchase， 但係 Notability 係一個subscription只可以用喺一個Device，想全部Device都用到個 App 就要超on9咁俾錢。
Template
以前 Notability 有嘅 template少過 GoodNotes 好多，但係依家 Notability 進步咗好多，都算幾多元化。兩個 App 都有最basic嘅全白、橫線、格仔同點點紙、仲有特別啲嘅Cornell紙、daily planner、五線譜。可以揀打橫定打直同紙嘅size。
GoodNotes 唔同嘅就係佢獨有嘅flashcard、唔同column數目嘅writing papers，仲有唔同款嘅planner同to do list，勁啱嗰啲好中意寫手帳嘅人，咁就唔洗年年都要去買過本新嘅schedule book！。
Notability 唔同嘅就有佢獨有嘅唔同運動場planner、適合畫數學嗰啲圖形唔同形狀嘅格仔紙，仲有食譜、餐單planner嗰啲。
整體個style， GoodNotes 會比較簡單，似muji嗰啲簡約feel，背景色都得白色、米色同黑色揀，大部份嘅template係人都用得著。仲有一個最特別就係佢可以揀Notes嘅封面/簿皮； Notability 就會有啲啲設計，背景色除咗頭先嗰3隻色都仲有好多花款，不過實唔實用就見仁見智，啲template就唔係個個都用得著。
咁我哋 GoodNotes 打埋個title就可以create Notes， Notability 就係create咗先改title嘅。你會見到兩個 App 上面都有一行工具列。
VIDEO
筆 螢光筆 擦膠 GoodNotes 嘅筆有3款，分別係鋼筆、原子筆同筆刷，鋼筆仲有得仔細較佢壓落去嘅力度敏感度同每一劃個尖嘅尖銳度，所有筆嘅粗幼度都可以自己較。顏色都有preset 15隻色，可以自己tune色或者直接打colour code再無限加落preset。
Notability 就有啲唔同，佢得兩種筆揀，似係 GoodNotes 嘅鋼筆同原子筆，另外多左兩種虛線筆，不過就冇得仔細set其他嘢同自己set粗幼度，只係preset咗12種粗幼度，有可能出現呢個又覺得太粗嗰個又覺得太幼嘅問題。顏色就preset咗32隻色，可以自己再加32隻。
至於螢光筆兩個 App 都同筆都大致一樣，只不過 GoodNotes preset就得5隻色，都一樣可以自己加同轉螢光筆粗度。
頂…寫錯字！ GoodNotes 嘅擦膠都真係算出色，total有3款，分別係precision擦膠幾大就擦幾多、standard、同stroke成個筆畫擦，size都係自己任較，仲有一個最特別嘅功能就係可以幫你自動lock咗啲字，淨係擦螢光筆。又或者如果你唔中意啲字嘅擺位，又可以用個套索工具，選取想郁嗰啲字，再任搬或者resize，甚至幫佢哋改顏色。
想打字嘅話兩個 App 都有，基本嘅功能都差唔多，唯一係 Notability 多左可以set favourite最常用嘅設定，仲可以customize成行text toolbar。
平時我哋想畫直線要用間尺、畫圓圈要用圓規，呢度兩個 App 都只要係你畫完hold住支筆，就會自己變左做正規嘅形狀，直線、圓形、正方形、三角形、星形乜都得，不過試落就good Notes相對敏感小小，hold 1.5秒基本上就ok， 但 Notability 要hold最少大約3秒，有時會出現sense唔到嘅問題。 GoodNotes 仲有個圖案功能就even hold都唔洗hold就自動變正規形狀，仲可以自動填色。
如果想design下份Notes，兩個 App 都有stickers可以揀加落去，有公仔、memo紙等等，呢個位 GoodNotes 嘅preset就得5個，選擇就少過 Notability 好多，雖然可以自己import落去，但又要上網搵又要Download就小煩； Notability 啲sticker就有好多唔同theme pack可以加，以量嚟講就真係大比數勝出。
頭先講過 GoodNotes 開新Notes嘅時候就已經可以用相/Scan Document形式開，但 Notability 就係入左個Notes右上角頭先加sticker嗰個加號可以加，仲可以加.gif同網上嘅短片。
寫晒一頁，我哋就可以加一頁新嘅。 GoodNotes 可以就咁拉新一頁出黎，但 Notability 就係打到差唔多佢就自動加一頁比你。跟住你第二頁想要第二款背景template， GoodNotes 係可以轉另一款嘅，但 Notability 就只可以用返同一款，或者就算轉都要成份Document，每頁都轉晒，呢個位就有小小唔user friendly。
兩個 App 都可以揀橫向或者打直咁碌頁數，唯一唔同係 Notability 可以跨頁寫嘢，但係good Notes就唔得嘅。
好，咁寫完份Notes之後呢佢就會自動save咗啦，呢兩個 App 其中一個最方便嘅功能就係自動upload到cloud或者drive做backup，咁就唔怕萬一部機死咗都有留底。仲有一個功能就係text recognition，即係如果你手寫好左份Notes，然後你想send比人，但係又嫌自己啲字太醜費事出醜，個 App 可以自動幫你將你手寫嘅字辨識做電腦字，咁就可以好方便出一份正式啲見得人嘅Document。 Notability 就可以辨識埋數學符號。
VIDEO
推薦 介紹晒兩個 App ，你又揀唔揀到呢？我建議如果用嚟簡單溫書寫筆記多嘅，重視實用，唔係超級無敵追求藝術完美嘅人就揀 GoodNotes ，始終佢係一次性付費，功能上相比起 Notability 其實真係唔大分別，係抵玩好多嘅。 Notability 就主力用喺上堂要間ppt重點，同錄低老師把聲，之後可以不停重溫，覺得呢個功能真係好必須或者好大幫助嘅話，或者想好有 design，好美觀嘅話，就應該 Notability 啱你啲。
所以其實最後揀邊一個就真係睇你自己偏好同多數點樣用，睇你覺得究竟貴左嘅 Notability 係咪真係值，定會唔會 GoodNotes 已經夠晒用。最後祝睇緊片嘅您快啲買到個 App 之後，真係努力咗溫書讀書。
